Fréttir

Glerárkirkja á í nánu samstarfi við KFUM og KFUK á Akureyri og viljum við benda á sumarbúðir þeirra við Hólavatn í botni Eyjafjarðar. Nýverið birtist á N4 viðtal við Jóhann H. Þorsteinsson um starfið á Hólavatni:

Í páskaprédikun sinni sem sr. Arna Ýrr birtir á trú.is segir hún m.a.: Í Jesú sjálfum mætast himinn og jörð - Guð og maður. Og upprisan, þetta ótrúlega kraftaverk, þessi atburður sem er okkur svo óskiljanlegur, hún er einmitt forsenda þess að við skynjum undrin allt í kringum okkur. Því að einmitt vegna upprisunnar eru himinn og jörð sífellt að mætast. Lesa prédikun á trú.is.

Vel yfir 100 börn fermast í Glerárkirkju í vor í sjö fermingarathöfnum. Allar fermingarathafnir hefjast kl. 13:30. Fermt er á eftirfarandi dögum: Laugardagur 14. apríl / Sunnudagur 15. apríl Laugardagur 21. apríl / Sunnudagur 22. apríl Laugardagur 28. apríl / Sunnudagur 29. apríl Laugardagur 26. maí Prestar kirkjunnar, þau sr. Gunnlaugur Garðarsson og sr. Arna Ýrr Sigurðardóttir þjóna í öllum fermingarmessum. Kór Glerárkirkju syngur undir stjórn Valmars Väljaots.

Helgihald í dymbilviku og um páska hefst í Glerárkirkju með kvöldmessu á Skírdagskvöld kl. 20:00. Á vef Glerárkirkju má nú finna upplýsingar um helgihaldið næstu daga. Þátttaka í helgihaldi páska markar hápunkt í messusókn fermingarbarna og foreldra þeirra á vorönn 2012 í aðdraganda ferminga. Það er sr. Arna Ýrr Sigurðardóttir sem leiðir kvöldmessuna á Skírdagskvöld. Kór Glerárkirkju syngur undir stjórn Valmars Väljaots. Allt helgihald í dymbilviku og um páska í Glerárkirkju er öllum opið.

Píslarsaga Krists verður lesin í messu á Föstudaginn langa í Glerárkirkju. Messan hefst kl. 11:00. Þar minnumst við krossdauða Jesú Krists, sem lét lífið fyrir okkur, syndugar manneskjurnar. Það er sr. Gunnlaugur Garðarsson sem þjónar í þessari messu. Kór Glerárkirkju syngur undir stjórn Valmars Väljaots.

,,Grundvöllur gildanna og gáta lífsins" er yfirskrift erindis sem Ágúst Þór Árnason, aðjunkt við Háskólann á Akureyri og deildarformaður lagadeildar flytur á fræðslu- og íhugunarstund í Glerárkirkju á Föstudaginn langa kl. 14:00.  Í upphafi stundarinnar er stutt helgistund. Boðið er upp á kaffiveitingar í safnaðarsal að erindi loknu og fólk hvatt til að taka þátt í umræðum. Umsjón með stundinni hefur sr. Gunnlaugur Garðarsson.

Kristin kirkja um alla veröld fagnar upprisu Krists á páskum. Víða um heim koma kristnir einstaklingar saman aðfaranótt páskadags, hugleiða og upplifa sigur lífsins, vonina sem vaknar í myrkrinu. Í Glerárkirkju leiðir sr. Gunnlaugur Garðarsson páskavöku sem hefst kl. 23:00. Sér við hlið hefur hann Valmar Väljaots og Kór Glerárkirkju. Allir velkomnir.

Við tökum daginn snemma í Glerárhverfi á páskadag því að það er messa í Glerárkirkju klukkan níu um morguninn og léttur morgunverður í boði á eftir. Það er sr. Arna Ýrr Sigurðardóttir sem stjórnar hátíðarmessunni þennan morgun og hefur Kór Glerárkirkju ásamt Valmari Väljaots sér við hlið. Þetta verður fögur morgunstund sem enginn ætti að láta fram hjá sér fara. Gleðilega páska!

Að kvöldi annars dags páska, mánudaginn 9. apríl er kvöldguðsþjónusta í Glerárkirkja kl. 20:00. Þar leiðir sr. Arna Ýrr Sigurðardóttir létta lofgjörðarstund þar sem Krossbandið, þau Snorri, Ragga, Stebbi og Haukur, sjá um tónlistina. Mikill söngur, hugljúf stund þar sem upprisugleðin er í fyrirúmi. Allir hjartanlega velkomnir.

Djáknarnir í Hallgrímskirkju og Glerárkirkju eiga pistil í dag á trú.is þar sem sóknarnefndir og allt kirkjunnar fólk er hvatt til að styrkja æskulýðsstarfið. Þau segja meðal annars: Það er því sérstakt þakkarefni að víða má finna sóknarnefndir sem leggja sig fram um að styðja við og standa sérstakan vörð um faglegt æskulýðsstarf. Lesa pistil á trú.is.