Fréttir

Á morgun, þriðjudaginn 14. ágúst hefjast gistiferðir verðandi fermingarbarna á Hólavatn í Eyjafirði. Minnt er á að nauðsynlegt er að skrá sig. Því fyrr sem fólk skráir sig, þeim mun betur getum við skipulagt ferðirnar. Þessar ferðir eru ekki hluti af formlegri fermingarfræðslu kirkjunnar heldur er um kynningu á æskulýðsstarfi Glerárkirkju að ræða. Skráning stendur yfir á netfangið glerarkirkja@glerarkirkja.is

Á sunnudegi um Verslunarmannahelgi er helgistund í Lögmannshlíðarkirkju kl. 11:00 í umsjón Péturs Björgvins djákna. Lesnir verða Davíðssálmar og farið með bænir. Áætlað er að helgistundin taki 15 mínútur. Fólk er hvatt til að taka með sér nesti því að helgistund lokinni setjumst við undir kirkjuvegginn og borðum nestið okkar ef veður leyfir.

Sunnudaginn 12. ágúst næstkomandi gerumst við árrisul í Glerárkirkju og bjóðum alla velkomna í guðsþjónustu klukkan níu um morguninn. Guðsþjónustan verður í umsjón sr. Alfred Essig frá Brackenheim í Þýskalandi og verður guðsþjónustan alfarið á þýsku. Að henni lokinni mun Pétur Björgvin segja frá safnaðarstarfinu og stöðu íslensku kirkjunnar í stuttu erindi í safnaðarsalnum. Það erindi verður sömuleiðis aðeins á þýsku. Dagskráin er opin öllum sem áhuga hafa.

Am Sonntag, 12. August 2012 findet um 09:00 Uhr ein Gottesdienst in Deutscher Sprache in Glerárkirkja, Akureyri, statt. Pfarrer Alfred Essig aus Brackenheim, Deutschland, leitet den Gottesdienst. Im Anschluß findet ein Vortrag im Gemeindesaal statt. Diakon Petur Thorsteinsson erzählt von der Gemeindearbeit und gibt Einblicke in die heutige Situation der Kirche in Island und die gesellschaftliche Diskussion.

Þann 27. júní 2012 féll dómur í Köln í Þýskalandi sem hefur vakið mikla athygli og er hann nú ræddur víða um heim. Í þessu máli fékk læknir á sig dóm fyrir að umskera ungan dreng að beiðni foreldranna. Ástæðan var ekki heilsufarsleg heldur trúarleg. Í nýjasta hefti rafræna tímaritsins "With Heart and Mind" sem kemur út hjá Lúterska heimssambandinu fer sr. Theresa Haenle ítarlega ofan í málavöxtu og hvetur fólk til að kynna sér málið.

Þú varst kannski að velta himninum dreyminn fyrir þér um leið og þú tyggðir strá eða hlýddir á randaflugusuðið, má vera að þú hafir verið að hugsa um gönguna yfir hálsinn eða Húnasiglingu nema það hafi verið heillandi kaffi, sem er framundan, útbúið af hressilegum liðsmönnum ferðafélagsins Fjörðungs, og þá vaknar þú allt í einu upp við raust klerksins, sem mælir fram orð Krists, „Varist falsspámenn.“ (Úr prédikun sr. Bolla Péturs Bollasonar)

Við í Glerárkirkju bendum á pistil dagsins í Akureyri - vikublaði þar sem Arndís Bergsdóttir vitnar meðal annars í dr. Daniel Golemann sem bendir á að ,,Margir álíti sem svo að í netheimum sé búið að aflétta þeim félagslegu reglum sem við öll förum eftir í okkar daglega lífi (til dæmis að bora ekki í nefið á almannafæri eða ganga ekki að annarri manneskju og berja hana). Og í hömluleysinu finnst mörgum þeir tilheyra hópi." Pistillinn er vel til þess fallinn að hvetja okkur öll til að hugsa um eigin netnotkun.

Forseti Íslands, Ólafur Ragnar Grímsson, sæmdi í dag frú Agnesi M. Sigurðardóttur biskup stórkrossi við athöfn á Bessastöðum. Orðustig Hinnar íslensku fálkaorðu eru fimm talsins. Fyrsta stig orðunnar er riddarakrossinn og eru flestir orðuþegar sæmdir honum. Annað stig er stórriddarakross, þriðja stig stórriddarakross með stjörnu, fjórða stig er stórkross, en æðsta stig fálkaorðunnar er keðja ásamt stórkrossstjörnu en hana bera einungis þjóðhöfðingjar. Stórkross fálkaorðunnar er sjaldan veittur.

Í nýjasta hefti Kirkjuritsins (78. árg. 1. h. 2012, bls. 10–16) birti Geir Waage grein er hann nefnir „Um Þjóðkirkjuna við tímamót“. Þeirri grein svarar dr. Hjalti Hugason með pistli á trú.is sem hann nefnir: "Þjóðkirkja við tímamót". Þar segir Hjalti meðal annars: "Raunar vekur grein Geirs upp spurninguna hvort lúthersk kirkja sé fremur kirkja presta eða safnaða. Hann vill sýnilega standa vörð um það sem kallað hefur verið „prestakirkja“."

Þessa dagana stendur Akureyrarkirkja fyrir ungmennaskiptaverkefni með stuðningi frá Evrópu Unga Fólksins, styrktaráætlun Evrópusambandsins. Sunnudagsmorguninn 22. júlí kom þessi 60 ungmenna hópur í Glerárkirkju til að taka þátt í mannréttindafræðsluverkefni byggðu á verkefni úr Kompás - Handbók Evrópuráðsins í mannréttindafræðslu með ungu fólki.