Fréttir

,,Grundvöllur gildanna og gáta lífsins" er yfirskrift erindis sem Ágúst Þór Árnason, aðjunkt við Háskólann á Akureyri og deildarformaður lagadeildar flytur á fræðslu- og íhugunarstund í Glerárkirkju á Föstudaginn langa kl. 14:00.  Í upphafi stundarinnar er stutt helgistund. Boðið er upp á kaffiveitingar í safnaðarsal að erindi loknu og fólk hvatt til að taka þátt í umræðum. Umsjón með stundinni hefur sr. Gunnlaugur Garðarsson.

Kristin kirkja um alla veröld fagnar upprisu Krists á páskum. Víða um heim koma kristnir einstaklingar saman aðfaranótt páskadags, hugleiða og upplifa sigur lífsins, vonina sem vaknar í myrkrinu. Í Glerárkirkju leiðir sr. Gunnlaugur Garðarsson páskavöku sem hefst kl. 23:00. Sér við hlið hefur hann Valmar Väljaots og Kór Glerárkirkju. Allir velkomnir.

Við tökum daginn snemma í Glerárhverfi á páskadag því að það er messa í Glerárkirkju klukkan níu um morguninn og léttur morgunverður í boði á eftir. Það er sr. Arna Ýrr Sigurðardóttir sem stjórnar hátíðarmessunni þennan morgun og hefur Kór Glerárkirkju ásamt Valmari Väljaots sér við hlið. Þetta verður fögur morgunstund sem enginn ætti að láta fram hjá sér fara. Gleðilega páska!

Að kvöldi annars dags páska, mánudaginn 9. apríl er kvöldguðsþjónusta í Glerárkirkja kl. 20:00. Þar leiðir sr. Arna Ýrr Sigurðardóttir létta lofgjörðarstund þar sem Krossbandið, þau Snorri, Ragga, Stebbi og Haukur, sjá um tónlistina. Mikill söngur, hugljúf stund þar sem upprisugleðin er í fyrirúmi. Allir hjartanlega velkomnir.

Djáknarnir í Hallgrímskirkju og Glerárkirkju eiga pistil í dag á trú.is þar sem sóknarnefndir og allt kirkjunnar fólk er hvatt til að styrkja æskulýðsstarfið. Þau segja meðal annars: Það er því sérstakt þakkarefni að víða má finna sóknarnefndir sem leggja sig fram um að styðja við og standa sérstakan vörð um faglegt æskulýðsstarf. Lesa pistil á trú.is.

Kór félags eldri borgara Í FÍNU FORMI verður með TÓNLEIKA í Glerárkirkju, laugardaginn 31. mars kl. 16:00. Einsöngur: Aðalsteinn Jónsson. Stjórnandi og meðleikari: Valmar Väljaots. Miðaverð kr. 1500. ATH: Ekki er tekið við greiðslukortum.

Safnaðarblað Glerárkirkju er komið út og hefur því verið dreift í öll hús í sókninni. Einnig er hægt að nálgast blaðið í kirkjunni. Í blaðinu er að finna upplýsingar um helgihald í Glerárkirkju um páskana sem og yfirlit vegna ferminga í apríl og maí.

Nú fer í hönd páskasöfnun Hjálparstarfs kirkjunnar. Að þessu sinni söfnum við fyrir fjölbreyttri aðstoð á Íslandi. Hjálparstarfið veitir faglega ráðgjöf og hjálp til sjálfshjálpar. Valgreiðslur að upphæð 2.400 krónur verða næstu daga sendar í heimabanka landsmanna, einnig er hægt að gefa framlag á framlag.is, í söfnunarsíma 907 2002 eða leggja inn á söfnunarreikning: 0334-26-886 kt. 450670-0499.

Sunnudaginn 1. apríl 2012 er fjölskylduguðsþjónusta í Glerárkirkju kl. 11:00. Boðið er upp á barnastarf í safnaðarsal á sama tíma, sameiginlegt upphaf í guðsþjónustunni. Það eru börn úr barna- og æskulýðskórum Glerárkirkju sem leiða sönginn í guðsþjónustunni undir stjórn Valmars Väljaots. Boðið er upp á hressingu að samveru lokinni.

Á héraðsfundi Eyjafjarðar- og Þingeyjarprófastsdæmis sem haldinn var í safnaðarsal Akureyrarkirkju laugardaginn 24. mars 2012 var samþykkt að gera átak í æskulýðsmálum á prófastsdæmisvísu árið 2013. Til þess að sinna því verkefni verður ráðinn æskulýðsfulltrúi í hálft starf í fimm mánuði frá 1. janúar. Sjá nánar á vef prófastsdæmisins.