Fréttir

Messa kl. 11. Sr. Gunnlaugur Garðarsson þjónar, Kór Glerárkirkju syngur. Sunnudagaskóli á sama tíma, sameiginlegt upphaf í messu. Allir velkomnir.

Barnakór Glerárkirkju æfir á miðvikudögum frá hálf fjögur til hálf fimm. Hann er opinn strákum og stelpum úr öðrum til fimmta bekk. Æskulýðskór Glerárkirkju æfir einnig á miðvikudögum frá klukkan hálf fimm. Þangað eru allir strákar og stelpur úr sjötta bekk og eldri velkomin. Kórstjóri er Marína Ósk Þórólfsdóttir. Henni til aðstoðar er Rósa Ingibjörg Tómasdóttir.

Fermingarfræðslan hefst í næstu viku með kynningarfundi fyrir fermingarbörn. Krakkar í Glerárskóla eiga að mæta mánudaginn 10. september kl. 17, krakkar í Giljaskóla þriðjudaginn 11. september kl. 17 og krakkar í Síðuskóla miðvikudaginn 12 september kl. 17. Mikilvægt er að skila skráningarblöðunum sem fylgdu með heimsendu bréfi á þessa kynningarfundi. Ef einhver getur ekki mætt með sínum skóla, þá er velkomið að mæta á annan hvorn hinna tveggja kynningarfundanna. Fermingarfræðslan hefst síðan skv. stundaskrá vikuna 16. - 22. sept. nk.

Næstkomandi sunnudag, 9. september hefst sunnudagaskólinn í Glerárkirkju. Sameiginlegt upphaf er í messu safnaðarins en fljótlega eftir að messan er hafin fara börnin og þeir foreldrar sem það kjósa inn í safnaðarsalinn þar sem sunnudagaskólinn er staðsettur. Þar er sungið, sagðar sögur, farið í leiki eða föndrað. Allir hjartanlega velkomnir.

Glerárkirkja, KFUM og KFUK og ÆSKR standa fyrir námskeiðinu "Ungt fólk, trú og lýðræði" sem fram fer í Glerárkirkju og á Hólavatni dagana 14. til 16. september næstkomandi. Námskeiðið er hugsað fyrir 18 til 25 ára ungt fólk. Unnið verður með verkefni úr Kompás - Handbók Evrópuráðsins í mannréttindafræðslu með ungu fólki, en einnig verða textar Biblíunnar um ungt fólk og áhrif þess skoðaðir. Þátttökugjaldið er aðeins 3.000 krónur. Skráning er hafin á skraning.kfum.is.

Aukakirkjuþing kom saman í dag. Til þess var boðað til að ræða ráðgefandi þjóðaratkvæðagreiðslu um endurskoðun stjórnarskrárinnar að því er varðar ákvæði hennar um þjóðkirkjuna. Kirkjuþingið hvetur kjósendur til að segja já við þjóðkirkjuákvæðinu.

Aukakirkjuþing samþykkti ályktun um skerðingu sóknargjalda í dag. Ályktunin er svohljóðandi: ,,Aukakirkjuþing, haldið 1. september 2012, lýsir yfir þungum áhyggjum af alvarlegri fjárhagsstöðu sókna landsins. Sóknir landsins hafa tekið á sig skerðingu eins og allir aðrir í þjóðfélaginu en sú skerðing hefur verið 25% umfram stofnanir innanríkisráðuneytisins. Kirkjuþing krefst tafarlausrar leiðréttingar sóknargjalda."

Rúmlega 50 manns sóttu fyrirlestur dr. Péturs Péturssonar sem haldinn var í safnaðarsal Glerárkirkju í gærkvöldi. Yfirskrift fyrirlestursins var ,,Akureyri: Sigurhæðir í kristnisögu Íslands" en þar fjallaði Pétur um sigurhæðir kristni á Akureyri í víðum skilningi þess orðs og minnti á að rætur kristni í Eyjafirði liggja allt aftur til landsnáms. Þá hvatti hann yfirvöld og aðra áhugasama á Akureyri til þess að skoða betur rætur kristni í Eyjafirði, meðal annars með því að leggja vinnu og fjármagn í leit að grafreit þar sem Þórunn Hyrna liggur grafin. Að mati Péturs er næsta víst að Þórunn hafi líkt og systir hennar Auður djúpuðga ekki viljað hvíla í óvígðri mold.

KFUM og KFUK hefur staðið í sumarbúðarekstri við Hólavatn í Eyjafirði frá árinu 1965. Húsakostur hefur nú breyst mikið með tilkomu 200 fermetra nýbyggingar sem tekin var í notkun nú í sumar og vígt 19. ágúst. Þar eru fimm herbergi með rúmum fyrir 34 og svo tvö starfsmannaherbergi. Eldri svefnaðstöðu í gamla hlutanum hefur verið breytt í tómstundarými með borðtennisborði, fótboltaspili og fönduraðstöðu.

Nú fer fermingarfræðslan að hefjast og í næstu viku fá öll börn í ´99 árganginum með lögheimili í sókninni sent kynningarbréf um fermingarstörfin. Skráning hefst síðan í kjölfarið og hvetjum við foreldra og tilvonandi fermingarbörn til að skrá sig sem fyrst. Gert er ráð fyrir kynningarfundum um fermingarstörfin fimmtudaginn 6. september, þriðjudaginn 11. og miðvikudaginn 12. september, síðdegis eftir skólatíma.