Fréttir

Opnaður hefur verið upplýsingavefur Þjóðkirkjunnar varðandi atkvæðagreiðslu um stjórnarskrártillögu þá sem kynnt er með heimsendum bæklingi fyrir þjóðinni allri. Á forsíðu upplýsingavefsins segir frú Agnes M. Sigurðardóttir biskup, m.a.: ,,Ég hvet til þess að spurningu um þjóðkirkjuákvæði í stjórnarskrá verði svarað játandi. ...þar sem stjórnarskráin er í grunninn sáttmáli okkar um undirstöður samfélagsins, er mikilvægt að um mögulegar breytingar á stjórnarskrá ríki breið sátt."

Frá ársbyrjun 2006 fram á sumarið 2011 tók æskulýðsstarf Glerárkirkju alls á móti 13 erlendum sjálfboðaliðum sem dvöldu hér allt frá 6 upp í 13 mánuði. Verkefnið var styrkt af Evrópu Unga Fólksins, sem er íslenskt heiti styrktaráætlunar Evrópusambandsins og snýr að ungmennum frá 13 til 30 ára. Til þess að meta gæði þessa starfs hér í Glerárkirkju komu 10 af þessum sjálfboðaliðum ásamt fulltrúum frá sínum sendisamtökum til landsins í febrúar síðastliðnum og áttu fund með fulltrúum Glerárkirkju. Matskýrsla á ensku um þetta verkefni er nú aðgengileg hér á vef Glerárkirkju sem pdf-skjal.

It all started back in 2005 with an application from the youth work department of the Evangelical Lutheran Church, Glerárkirkja. It was an application for a European Voluntary Service (EVS) project. The project was called "Together in Snow and Sun." Since then, 13 volunteers have spent from 6 to 13 months in Akureyri as European Volunteers, participating in Glerárkirkja's projects. Earlier this year 10 of them came again to Iceland together with representatives from their organisations. This time they had a different task. Together they where asked to evaluate Glerárkirkja's EVS project. Now, a few months later we in Glerárkirkja are proud to present the evaluation report, online as a PDF-document.

12 spora fundir í Glerárkirkju verða á mánudögum kl. 19:30 í vetur. Í kvöld, 1. október kl. 20:00 er komið að þriðja og síðasta svokallaða opna kvöldi þar sem öllum gefst kostur á að kynna sér starfið. Frá og með fjórða kvöldi geta engir nýir bæst í hópinn, því frá þeim tíma er unnið í lokuðum sjálfshjálparhópum.

KFUM og KFUK ásamt Glerárkirkju bjóða upp á fræðslukvöld fyrir unglinga og foreldra um samfélagsmiðla á netinu með stuðningi Æskulýðssjóðs. Fræðslukvöldið verður haldið í kvöld, miðvikudagskvöldið 3. október og hefst kl. 20:00 í safnaðarsal Glerárkirkju. Leiðbeinandi á námskeiðinu er Halldór Elías Guðmundsson djákni og æskulýðsfulltrúi hjá KFUM og KFUK á Íslandi.

Fræðslukvöldin í Glerárkirkju í október og nóvember bera að þessu sinni yfirskriftina "Hvað er kristin trú?" og er fræðslan byggð á samnefndri bók eftir Halvor Moxnes sem kom út í þýðingu sr. Hreins Hákonarsonar hjá Skálholtsútgáfunni á síðasta ári. Fræðslukvöldin verða á miðvikudagskvöldum kl. 20:00 - 22:00. Að loknu inngangserindi málshefjanda er kaffihlé og síðan taka við umræður og eru þátttakendur hvattir til virkrar þátttöku, þó vissulega sé líka velkomið að sitja hljóður og hlusta.

Hjálparstarf kirkjunnar veitir bágstöddum um allt land aðstoð, árið um kring. Félagsráðgjafi veitir innanlandsdeild Hjálparstarfsins forstöðu en tveir félagsráðgjafar eru starfandi hjá stofnuninni. Tekið er á móti fólki sem sækir um og þeim veitt ráðgjöf og ýmis aðstoð eftir aðstæðum fyrir hönd Hjálparstarfsins í Glerárkirkju á viðtalstímum presta, þriðjudaga til föstudaga milli 11:00 og 12:00. Barnafjölskyldur sem og einstaklingar geta fengið inneignarkort í matvöruverslunum. Allir geta sótt um aðstoð við að leysa út lyf (ekki þríhyrningsmerkt lyf), fengið stuðning við skólagöngu og tómstundir barna. Varðandi fatnað vísum við alla jafna á Rauða Krossinn og Hjálpræðisherinn. Okkar hlutverk í Glerárkirkju er m.a. að koma útfylltum umsóknum til Hjálparstarfsins. Öllum umsóknum þurfa að fylgja gögn sem sýna fram á tekjur og gjöld viðkomandi.

Glerárkirkja stendur fyrir skyndihjálparnámskeiði fyrir starfsfólk og sjálfboðaliða kirkjunnar og KFUM og KFUK. Um fjögurra kennslustunda námskeið er að ræða. Námskeiðið fer fram í safnaðarsal Glerárkirkju þriðjudaginn 9. október og hefst kl. 17:30. Þátttaka er ókeypis, skráning á netfangið glerarkirkja@glerarkirkja.is.

Fimmtudagskvöldið 4. október kl. 20:00 er foreldrafundur í UD-Glerá, sameiginlegu unglingastarfi KFUM og KFUK og Glerárkirkju. Til fundarins er boðað til að ræða markmið og ramma unglingastarfsins og sérstaklega fyrirhugaða ferð á Evrópuhátíð KFUM og KFUK í ágúst 2013. Fundurinn verður haldinn í félagsheimili KFUM og KFUK í Sunnuhlíð en þar fer unglingastarfið fram. Þeir 50 krakkar sem mættu í gærkvöldi (27. september) fengu foreldrabréf með sér heim, en það er einnig birt hér á vef Glerárkirkju:

Þriðja fimmtudagskvöldið í röð mættu um 50 krakkar í sameiginlegt unglingastarf KFUM og KFUK og Glerárkirkju sem nú hefur hlotið nafnið UD-Glerá. Dagskrá kvöldsins hófst með helgistund þar sem að sagt var frá því þegar Jesú hitti lærisveinana við Tíberíasvatn og borðaði með þeim grillaðan fisk og brauð (Jóh. 21). En það var í þriðja sinn sem Jesús birtist lærisveinum sínum upp risinn frá dauðum. Að helgistund lokinni tók við skapandi verkefni þar sem hver hópur bjó til myndastyttu. Kvöldinu lauk svo með pizzuveislu en krakkarnir slógu saman í 15 pizzur. Það var kátur og fjörugur hópur sem hélt heim á leið að samveru lokinni, öll með foreldrabréf í vasanum því næst (4. október) er foreldrafundur.