Fréttir

Í fréttum RÚV er talið niður til jóla. Þegar 12 dagar voru til jóla sýndi RÚV frá jólakortasýningu í Glerárkirkju, en sýningin verður opin fram í janúar í kringum athafnir í kirkjunni. Horfa á frétt á RÚV.

Í ár verður jólasamvera eldri borgara föstudaginn 16. desember kl. 15:00. Níels Árni Lund, skrifstofustjóri verður gestur samverunnar. Hann er mikilvirkur gamanvísnasöngvari og hefur gefið út geisladisk með eigin textum við þekkt lög. Einnig hefur hann gefið út bókina Af heimaslóðum sem segir frá lífi fólksins á Melrakkasléttu auk þess sem hann vinnur að annarri bók um sama svæði. Níels Árni mun flytja jólahugvekju auk þess sem hann mun taka lagið og flytja skemmtilegan fróðleik.

Nýverið tóku Skálholtsútgáfan og Glerárkirkja höndum saman og buðu upp á bókakaffi í Glerárkirkju þar sem Óskar Guðmundsson sagði frá nýútkominni bók um Þórhall Bjarnarson, biskup. Þeim sem komust ekki þetta kvöld er bent á viðtal sem Hilda Jana á N4 tók við Óskar og má skoða hér fyrir neðan.

Jólatónleikar Kórs Glerárkirkju eru að þessu sinni í samvinnu við Kór eldri borgara á Akureyri - Í fínu formi. Stjórnandi beggja kóra er Valmar Väljaots. Hann sér líka um undirleik og fær til liðs við sig Marínu Ósk Þórólfsdóttur sem leika mun á þverflautu. Frítt er inn og allir hjartanlega velkomnir. Hugsast gæti að skemmtilegir og svolítið skrítnir gestir litu í heimsókn:o)

Fjölskylduguðsþjónusta verður í Glerárkirkju fjórða sunnudag í aðventu - 18. desember 2011. Lifandi marimbatónlist frá 10:45. Guðsþjónustan hefst kl. 11:00.  * Suzukinemendur frá Tónlistarskólanum á Akureyri leika nokkur lög á fiðlurnar sínar. * Marimbasveitin Mandísa heldur uppi fjörinu undir stjórn Ástu Magnúsdóttur tónmenntakennara. * Leikþáttur um hann Pésa sem langar að verða jólasveinn. * Mikill almennur söngur undir stjórn Marínu Óskar Þórólfsdóttur. * Sr. Arna og Pétur djákni sjá um dagskrána ásamt barnastarfsfólki. * Sunnudagaskólabörnum boðið að koma upp og prufa að vera "kór". * Litið inn í jólaguðspjallið og "Heims um ból" á sínum stað. * Gengið í kringum jólatréð í safnaðarsal í lokin. * Askasleikir kemur í heimsókn. PDF-skjal til útprentunar.

N4, Icelandair, Vodafone og Bílaleiga Akureyrar eru bakhjarlar söfnunar til styrktar Hjálparstarfi kirkjunnar. Söfnunin fer fram í beinni útsendingu á N4 frá Menningarhúsinu Hofi, föstudagskvöldið 16. desember kl. 20:00. Símalínurnar eru hins vegar opnar nú þegar og um að gera að hringja og styrkja gott málefni: 9071901 - 1000 kr. 9071903 - 3000 kr. 9071905 - 5000 kr. Allur ágóði rennur til Hjálparstarfs kirkjunnar á Norðurlandi. Sjá nánar á help.is. Tryggið ykkur miða á www.midi.is eða á www.menningarhus.is.

Velunnarar Glerárkirkju eru hvött til að fylgjast með viðburðum og starfi kirkjunnar í gegnum heimasíðuna þar sem starfsfólk reynir að birta fréttir af starfinu. Bent er á þann möguleika að smella á "líkar við" á Facebook-síðu kirkjunnar:https://www.facebook.com/glerarkirkja. Einnig má nota reit hér til vinstri og biðja um að vera skráður á póstlista kirkjunnar.

Börnin sem koma í sunnudagaskóla í Glerárkirkju á sunnudögum fá gefins litlar biblíumyndir. Þar sem mörgum finnst gaman að safna þessum myndum höfum við í Glerárkirkju gefið börnunum bækur til þess að hafa myndirnar í. 150 bækur sem til voru í haust kláruðust mjög fljótt. Því miður hefur dregist að fá nýjar bækur úr prentun en nú eru þær loksins komnar aftur. Það er því tilvalið að koma í sunnudagaskólann á sunnudaginn og fá bók!

Eins og undanfarin ár er stór hópur fólks sem þarf á fjárhagslegri aðstoð að halda fyrir jólin. Við í Glerárkirkju minnum á að - eins og margoft hefur verið auglýst í Dagskránni - síðasti umsóknardagurinn er 8. desember. Nauðsynlegt er að umsækjandi komi með gögn sem sýna helstu tekjur og gjöld viðkomandi. Hægt er að sækja um hjá presti eða djákna.

Sl. föstudag sóttu rúmlega áttatíu manns hádegisstund í safnaðarheimili Glerárkirkju þar sem Sigrún Sigurðardóttir, doktorsnemi í lýðheilsuvísindum flutti erindi og Guðrún Ebba Ólafsdóttir las upp úr nýútkominni bók sinni. Við hér í Glerárkirkju fögnum því hve vel var mætt og bendum áhugasömum á pistil sem birtist í dag eftir Sigrúnu. Þar segir hún meðal annars: Það minnkar ekki afleiðingar ofbeldisins að þegja það í hel, einstaklingurinn sem fyrir því verður situr samt sem áður uppi með skaðann. Hjálpum þeim sem eru fastir í þögulli þjáningunni. Lesa pistil Sigrúnar á vísir.is.