Fréttir

Æskulýðsstarf Glerárkirkju er viðurkennd sendisamtök fyrir evrópska sjálfboðaliða innan Evrópu Unga Fólksins. Síðastliðið sumar fóru tveir sjálfboðaliðar til Noregs frá okkur, en þetta er annað sumarið sem Æskulýðsstarf Glerárkirkju sendir sjálfboðaliða erlendis. Hins vegar hafa alls komið 13 sjálfboðaliðar til okkar síðustu 6 árin. Þegar sjálfboðaliðar koma heim aftur eru þeir beðnir að svara nokkrum spurningum og segja frá verkefninu. Hér koma svörin frá þeim Brynju og Þorbjörgu.

Við hér í Glerárkirkju minnum á ferðir fermingarbarna á Löngumýri. * Fimmtudagur, 20. október. Börn úr Síðuskóla. Brottför kl. 08:30. * Föstudagur, 21. október. Börn úr Giljaskóla. Brottför kl. 08:30. ATH: Ferðirnar eru öllum opnar, líka þeim sem sækja ekki fermingafræðslu í Glerárkirkju. Sjá nánar í eldri frétt hér á vefnum.

ATH: Því miður er Aðalsteinn Bergdal forfallaður! Tveggja manna tal á miðvikudagskvöldum í Glerárkirkju heldur áfram 19. október. Nú er röðin komin að sr. Hauki Ágústssyni presti og kennara og Aðalsteini Bergdal leikara. Yfirskrift kvöldsins er: ,,Leikhúsið og helgihaldið" en þeir munu m.a. fást við eftirfarandi spurningar: Eru guðspjöllin vel til þess fallin að leika þau á sviði? Hvers vegna (ekki)? Hvað er sérstakt við form guðspjallanna? Hvernig tengjast guðspjöllin helgihaldi kirkjunnar? Dagskráin hefst kl. 20:00 með stuttri helgistund og tveggja manna tali þeirra Hauks og Aðalsteins. Að loknu kaffihléi um níuleytið tekur við samtal við almenna þátttakendur. Allir velkomnir - aðgangur ókeypis.

Velkomin á vef Glerárkirkju. Við, starfsfólkið í húsinu, reynum eftir því sem við höfum tök á að setja inn fréttir og fleira um viðburði og fasta dagskrárliði í kirkjunni. Það er alltaf eitthvað sem betur má fara og gleðjumst við yfir ábendingum á netfangið glerarkirkja@glerarkirkja.is. Umsjón með vefsíðunni hefur Sverrir Pálmason, s. 464 8803, en innihald einstakra undirsíðna og frétta er á ábyrgð hvers starfsmanns eftir starfssviði. Við bendum sérstaklega á dagatalið hér til vinstri á forsíðunni. Með því að smella á viðkomandi dag má lesa um þá viðburði sem eru auglýstir þann dag.

Æskulýðskór Glerárkirkju hefur nú hafið æfingar aftur og verða æfingar kórsins á fimmtudögum kl. 17:00 í safnaðarheimilinu. Stjórnandi er Marína Ósk Þórólfsdóttir tónlistarkennari. Kórinn er ætlaður börnum í 6. bekk og eldri. Hann kemur fram í fjölskylduguðsþjónustum í Glerárkirkju einu sinni í mánuði, auk ýmissa annarra tækifæra.

Um 30 manns sóttu umræðukvöld í Glerárkirkju sl. miðvikudagskvöld þar sem dr. Sigurjón Árni Eyjólfsson flutti framsögu og svaraði fyrirspurnum þátttakanda. Þema kvöldsins var ,,kirkjan og guðfræðin" og lá bók páfa ,,Jesús frá Nasaret" til grundvallar umræðunni. Lesa áfram á vef prófastsdæmisins.

Á umræðukvöldum í Glerárkirkju þetta misserið er fjallað um bók páfa ,,Jesús frá Nasaret". Í þeim hluta sem fjallað er um í kvöld segir hann meðal annars: Eðli allra freistinga er ... að víkja Guði til hliðar vegna þess að við teljum hann aukaatriði og lítum hreinlega á hann sem óþarfan og þreytandi í samanburði við allt það sem virðist mikilvægara til að veita okkur lífsfyllingu. Að reisa heim við okkar eigið ljós án tengsla við Guð, að byggja á okkar eigin grunni og hafna öllum veruleika utan við þann pólitíska og efnislega og víkja Guði til hliðar sem tálmynd - þetta er freistingin sem ógnar okkur og birtist okkur í mörgum mismunandi myndum. Óheil siðferðileg afstaða er ær og kýr freistingarinnar. ... Hún læst líka tala fyrir sönnu raunsæi: Það sem er raunverulegt er það sem er beint fyrir framan nefið á okkur - völd og peningar. Í samanburði verður allt sem snertir Guð óraunverulegt, minni háttar og eitthvað sem enginn þarf á að halda. (Bls. 46). Þátttakendur í tveggja manna tali í kvöld eru dr. Sigurjón Árni Eyjólfsson og sr. Sigríður Munda Jónsdóttir. Sjá nánar á vef prófastsdæmisins.

Prestar kirkjunnar hafa nú sent öllum foreldrum fermingarbarna bréf heim í pósti með upplýsingum vegna ferðalags á Löngumýri. Ef bréfið hefur af einhverjum orsökum ekki borist þá er það einnig aðgengilegt hér fyrir neðan.

Það er til marks um að fólki þyki vænt um kirkjuna sína og starfið sem þar fer fram þegar gagnrýni er komið á framfæri um það sem betur má fara í kirkjustarfinu. Valgarður Stefánsson skrifaði í Velvakanda á dögunum og benti réttilega á að þó að upptaka af fræðslukvöldi fari fram, megi ræðumaður ekki bara horfa í myndavélina. Bréf hans til Velvakanda má lesa hér fyrir neðan í heild sinni.

Fyrsta samræðukvöldið um trúna á Krist, guðspjöllin og nútímann var á miðvikudaginn var. Hér á vefnum má nú hlusta á tveggja manna tal þeirra sr. Jóns Ármanns Gíslasonar, prófastur, og Jóns Vals Jenssonar, kaþólskur guðfræðingur, um efni kvöldsins: Sagan og raunveruleikinn. Þá flutti sr. Guðmundur Guðmundsson stuttan inngang um ærlegt samtal páfa og rabbía. Næsta miðvikudagskvöld kl. 20 halda svo sr. Sigríður Munda Jónsdóttir, sóknarprestur í Ólafsfirði, og dr. Sigurjón Árni Eyjólfsson, héraðsprestur í Reykjavík áfram með efnið: Kirkjan og guðfræðin. Lesa áfram á vef prófastsdæmisins.