Fréttir

Fermingarfræðslan í Glerárkirkju á vorönn hefst með þemaviku fermingarbarna þriðjudaginn 22. janúar og mæta ungmennin þá vikuna í fermingarfræðslu skv. stundaskrá. Í heimsókn hjá okkur verður 18 manna hópur frá Bandaríkjunum og Kanada. Fjölbreytt dagskrá vikunnar er kynnt hér á glerarkirkja.is. Boðið er upp á fjölbreytt hópastarf til viðbótar við fermingarfræðslutímana og eru foreldrar hvattir til að kynna sér dagskrána og hvetja börnin til þátttöku. Þemavikan endar með virkri þátttöku fermingarbarna í messu safnaðarsins sunnudaginn 27. janúar kl. 11:00. Umsjón með þemavikunni hefur djákni Glerárkirkju, Pétur Björgvin og gefur hann nánari upplýsingar í síma 864 8451.

Sunnudaginn 13. janúar 2012 er kvöldmessa í Glerárkirkju kl. 20:00. Þar sér Krossbandið um tónlistina og meðal annars munu þau Snorri, Ragga og Stefán flytja nokkur lög eftir Bergþóru Árnadóttur. Prestur er sr. Arna Ýrr Sigurðardóttir. Allir velkomnir.

Í sumar mun fríður hópur ungmenna úr UD-Glerá sem er sameiginlegt unglingastarf KFUM og KFUK og Glerárkirkju taka þátt í Evrópuhátið KFUM og KFUK sem verður haldin í Prag í Tékklandi. Að sjálfsögðu eru krakkarnir dugleg við fjáröflun því að svona ferð kostar sitt. Þessa dagana ganga þau í hús og selja sand í fötum og hefur sumum þeirra bara gengið nokkuð vel, því að víða er hált. Við hvetjum fólk til að taka krökkunum vel.

Framundan er þemavika fermingarbarna í Glerárkirkju. Til að gera vikuna sem skemmtilegasta hefur Glerárkirkja fengið til liðs við sig 18 manna hóp fólks milli tvítugs og þrítugs sem sækir biblíuskóla á vegum Youth with a Mission, en þau eru nú stödd í Íslandi í starfsþjálfun. Hópurinn mun dvelja á Akureyri frá mánudeginum 21. janúar til og með sunnudagsins 27. janúar. Enn vantar gistipláss fyrir 10 af 18, en leitað er eftir gestgjöfum sem geta boðið upp á rúm (má vera sófi á holi eða í stofu, jafnvel dýna á gólfi) og gefið viðkomandi morgunmat. Allar aðrar máltíðir verða sameiginlegar í kirkjunni fyrir hópinn. Nánari upplýsingar gefur Pétur Björgvin í síma 864 8451 eða á netfangið petur[hjá]glerarkirkja.is.

Þessa dagana stendur yfir sýning á verkum handverkskonunnar og ljósmyndanemans Díönu Bryndísar í Glerárkirkju. Díana Bryndís, einnig þekkt sem Mamma Dreki, leggur stund á nám í ljósmyndun við New York Institute of Photography en er búsett í dag ásamt fjölskyldu sinni norðan ár á Akureyri. Sýning hennar var opnuð á afmælishátíð Glerárkirkju í desember og stendur sýningin fram í febrúar. Sýningin er opin alla virka daga frá 11:00 til 16:00 sem og þegar viðburðir eru í kirkjunni.

Foreldramorgnar hefjast aftur þriðjudaginn 15. janúar 2013. Þeir verða alla þriðjudaga á vorönn frá kl. 10:00 til 12:00. Umsjón með foreldramorgnunum hefur sr. Arna Ýrr Sigurðardóttir. Á þessum fyrsta foreldramorgni verður skyndihjálparfræðsla á dagskránni og hvetjum við foreldra ungra barna til að fjölmenna.

Hér á vef kirkjunnar má nú nálgast pdf-skjal sem inniheldur drög að dagskrá helgihalds á vorönn í Glerárkirkju og er dagskráin birt með fyrirvara um breytingar/prentvillur.

Þriðjudagskvöldið 8. janúar kl. 20:00 verður foreldrafundur í sal KFUM og KFUK í Sunnuhlíð. Fundurinn er ætlaður foreldrum og unglingum sem hafa hug á að sækja Evrópuhátíð KFUM og KFUK í Prag í ágúst 2013. Forskráningu á hátíðina lýkur 25. janúar. Þeir sem skrá sig seinna þurfa að reikna með því að greiða hærra verð fyrir þátttöku í hátíðinni. Ferðin á hátíðina er sameiginlegt verkefni KFUM og KFUK á Akureyri og Glerárkirkju.

Fermingarfræðslan á vorönn hefst með þemaviku fermingarbarna dagana 22. til 27. janúar. Þá viku mæta börnin í fermingartíma samkvæmt stundarskrá en auk þess er fjölbreytt dagskrá í boði síðdegis þriðjudaginn 22. janúar, miðvikudaginn 23. janúar og laugardaginn 26. janúar. Þemavikan endar með virkri þátttöku fermingarbarna í messu safnaðarins sunnudaginn 27. janúar kl. 11:00. Gestir þemavikunnar að þessu sinni er 18 manna erlendur hópur ungs fólks. Þessa dagana er verið að leita að gestgjöfum til að hýsa þau. Áhugasamir eru beðnir um að hafa samband við Pétur djákna í síma 864 8451 eða á netfangið petur@glerarkirkja.is.

Fyrirbænastund verður í Glerárkirkju miðvikudaginn 9. janúar kl. 12:00. Umsjón með stundinni hefur Pétur Björgvin Þorsteinsson, djákni en Valmar Väljaots sér um tónlistina. Að bænastund lokinni er boðið upp á léttan hádegisverð í safnaðarsal á vægu verði. Allir hjartanlega velkomnir. Tekið er á móti fyrirbænarefnum á netfangið petur@glerarkirkja.is eða í síma 464 8807.