Fréttir

Jólasöngvarnir verða í fyrirrúmi á jólasamveru eldri borgara í Glerárkirkju fimmtudaginn 13. desember kl. 15:00 en þar munu þau Snorri Guðvarðsson og Ragnheiður Júlíusdóttir leiða almennan söng. Sérstakur gestur samverunnar er Bragi Guðmundsson, prófessor við Háskólann á Akureyri. Rúta ekur frá Lindasíðu kl. 14:45 með viðkomu í Lögmannshlíð. Það eru allir velkomnir á þessa jólasamveru og að sjálfsögðu verður kaffihlaðborð að hætti Rósu.

Hér á vef Glerárkirkju eru nú birtar nokkrar myndir frá hátíðardagskrá i tali og tónum sem fram fór í Glerárkirkju laugardaginn 8. desember 2012. Myndirnar tók Bjarni Eiríksson.

Nýtt framtak er orðið til á gömlum grunni. Mæðrastyrksnefnd Akureyrar, Hjálparstarf kirkjunnar, Hjálpræðisherinn og Rauði krossinn sameinast nú um stuðning við þau sem þurfa á sérstakri aðstoð að halda fyrir jólin. Vonir standa til að fólk á svæðinu taki höndum saman til styrktar þessu verkefni, því sameinuð getum við lyft grettistaki.

Þó að jólin séu hátíð ljóss og friðar, og flestir hlakki til alls þess sem jólahaldið býður upp á, þá eru þau líka til sem upplifa tímann fyrir jól sem erfiðan og hlaðinn kvíða.

Biskup Íslands, frú Agnes M. Sigurðardóttir flytur hátíðarprédikun í messu á vígsluafmæli Glerárkirkju sunnudaginn 9. desember kl. 14:00. Kór Glerárkirkju undir stjórn Valmars Väljaots flytur Krýningarmessu eftir Wolfgang Amadeus Mozart ásamt einsöngvurum. Vígðir þjónar kirkjunnar þjóna í messunni. Að messu lokinni er boðið til vígsluafmæliskaffis.

Sunnudaginn 9. desember höldum við í Glerárkirkju upp á 20 ára afmæli kirkjunnar. Að sjálfsögðu verður sérstakur afmælissunnudagaskóli. Við fáum alla kirkjuna fyrir okkur því að messan verður seinna um daginn. Þess vegna biðjum við alla sunnudagaskólakrakkana að koma og taka vini sína, foreldra, afa og ömmur með sér. Sýnt verður leikritið ,,Pési vill gerast jólasveinn" en þar bregður Pétur Björgvin djákni sér í búning stráks sem langar svoooooooooooooooooooo mikið að verða jólasveinn.

Í tilefni af afmæli kirkjunnar ætlum við að gera okkur glaðan dag á margan hátt í Glerárkirkju. Meðal annars er fermingarbörnum og eldri unglingum boðið í safnaðarsal Glerárkirkju sunnudagskvöldið 9. desember kl. 20:00. Þar er ætlunin að setjast fyrir framan bíóskjá, horfa á góða mynd saman og njóta passlegra veitinga. Það eru allir 13 ára og eldri velkomnir, aðgangur er ókeypis.

Samfylgd kristni og þjóðar í þúsund ár var yfirskrift hátíðarerindis sem dr. Hjalti Hugason flutti laugardaginn 8. desember kl. 16:00 í Glerárkirkju í tilefni af 20 ára vígsluafmæli Glerárkirkju. Afmælisdagskráin hófst á föstudegi og stendur fram á sunnudagskvöld. Þessi hluti dagskrárinnar hófst með tónlistar- og helgistund í kirkjunni áður en gengið var í safnaðarsalinn þar sem gestum gafst kostur á að hlýða á 30 mínútna langt erindi Hjalta, njóta kaffiveitinga og ræða í lokin efni fyrirlestursins. Þeim sem ekki höfðu tök á því að mæta á staðinn gefst hins vegar kostur á að horfa á upptöku af erindinu hér á vef Glerárkirkju.

Rúmlega áttatíu manns tóku þátt í dagskrá á opnunarkvöldi vígsluhátíðar í tilefni af 20 ára afmæli Glerárkirkju. Bjarni Eiríksson tók nokkrar myndir, bæði við opnun á handverks- og ljósmyndasýningu Díönu Bryndísar og á kaffihúsakvöldi kvenfélagsins Baldursbrár þar sem að þau Linda, Jokka og Reynir sáu um tónlistina. Myndirnar er nú hægt að skoða hér á glerarkirkja.is.

Laugardaginn 8. desember 2012 er sérstök hátíðardagskrá í Glerárkirkju í tali og tónum. Tilefnið er 20 ára vígsluafmæli Glerárkirkju. Þar flytur dr. Hjalti Hugason prófessor í kirkjusögu við guðfræði- og trúarbragðafræðideild Háskóla Íslands erindi sem ber yfirskriftina ,,Samfylgd þjóðar og kristni í 1.000 ár.“ Dagskráin hefst kl. 16:00 með stuttu tónlistaratriði sem Valmar Väljaots stjórnar og bænagjörð áður en gengið er í safnaðarsalinn þar sem dr. Hjalti flytur erindi sitt. Að erindi loknu er boðið upp á kaffiveitingar og umræður. Allir hjartanlega velkomnir, aðgangur ókeypis.