Fréttir

Á visir.is má nú finna grein Péturs Björgvins djákna um tengsl skóla og kirkju. Þar segir meðal annars: ,,Heimsóknir leikskóla- og grunnskólabarna í kirkjur hafa verið nokkuð til umræðu í fjölmiðlum á þessari aðventu. Því ber að fagna. Sátt um sambúð ólíkra hefða í samfélaginu hefst með hreinskiptinni umræðu. Það á sérstaklega við ef við sem tökum til máls erum vel upplýst og sýnum hvert öðru þá virðingu að fara með rétt mál."

Í morgun var nýr vefur biskups Íslands formlega opnaður á Biskupsstofu. Hann er settur upp til að almenningur eigi kost á betri innsýn í starf biskups. Þar er sagt frá störfum biskups, sýndar myndir úr kirkjustarfi um allt land og sagt frá biskupsembættinu og konunni sem nú gegnir því.

Kirkjuþing kemur saman til þingfundar á morgun, laugardaginn 15. desember kl. 9. Á dagskrá eru málefni sem varða fjármál þjóðkirkjunnar. Þingið mun að þessu sinni funda í Þjóðmenningarhúsinu við Hverfisgötu. Listi yfir þingmál, gerðir þingsins, fréttir af þinginu og upptökur af umræðum er að finna á vef þingsins, www.kirkjuthing.is. Pétur Björgvin Þorsteinsson, djákni í Glerárkirkju situr þingið sem fulltrúi vígðra þjóna úr Eyjafjarðar- og Þingeyjarprófastsdæmi.

Fjölskylduguðsþjónusta verður í Glerárkirkju á þriðja sunnudegi í aðventu, 16. desember kl. 11:00. Þar mun Marína Ósk Þórólfsdóttir ásamt aðstoðarkonu sinni Rósu Ingibjörgu Tómasdóttur stjórna söng Barnakórs Glerárkirkju og Æskulýðskórs Glerárkirkju. Sr. Gunnlaugur Garðarsson og Pétur Björgvin Þorsteinsson djákni þjóna. Brúðuleikhús sunnudagaskólans verður á sínum stað. Allir velkomnir.

Hilda Jana, fréttakona norðlensku sjónvarpsstöðvarinnar N4 tók Baldur Dýrfjörð sóknarnefndarmann tali í Glerárkirkju nokkrum dögum fyrir 20 ára vígsluhátíð kirkjunnar og spurði hann meðal annars út í sögu kirkjunnar. Viðtalið er nú aðgengilegt á netinu.

Í pistli nýverið á trú.is mátti meðal annars lesa þessi orð undirritaðs: ,, Mín tilfinning er sú að okkur, kirkjunnar þjónum, hætti stundum til að þykja mikilvægara að nota orð hefðarinnar heldur en að efla einstaklinginn sem mætir eða mætir ekki í kirkjuna svo hann geti tjáð sig um eiginn skilning á því sem fram fer og sagt er." Það væri ánægjulegt ef þú, lesandi góður, tækir þér tíma til að lesa þennan pistil.

Það á ,,að koma skýrt fram í allri boðun kirkjunnar, að sem lærisveinar Jesú Krists verðum við alltaf að taka okkur stöðu með þeim sem þurfa að þola hvers konar ofbeldi og kúgun. Það er óásættanlegt að gefa afslátt af þeirri afstöðu. Ofbeldi er synd og á hvergi að líðast, það er alveg skýrt." skrifar sr. Arna Ýrr Sigurðardóttir meðal annars í grein sem birtist í dag í Fréttablaðinu í tilefni af 16 daga átaki gegn kynbundnu ofbeldi sem er nýlokið.

Á vef Þjóðkirkjunnar má finna í dag frásögn af vígsluhátíð Glerárkirkju. Þar er meðal annars vitnað í prédikun biskups sem sótti Glerárkirkju heim um helgina af þessu tilefni: ,,Vakið. Kæri söfnuður. Haldið vöku ykkar gagnvart öllu því er ykkur er trúað fyrir í þessu húsi. Haldið vöku ykkar gagnvart því starfið er hér fer fram. Haldið vöku ykkar gagnvart lífi ykkar og náunga ykkar. En fyrst og fremst haldið vöku ykkar gagnvart Orði Guðs sem aldrei líður undir lok hvernig svo sem allt velkist í heimi hér."

Jólatónleikar Kórs Glerárkirkju í samvinnu við Kór eldri borgara ,,Í fínu formi" verða haldnir í Glerárkirkju á þriðja sunnudegi í aðventu, 16. desember kl. 16:00. Stjórnendur eru Valmar Väljaots og Petra Björk Pálsdóttir. Marína Þórólfsdóttir leikur á þverflautu. Það er frítt inn og allir velkomnir á meðan húsrúm leyfir.

Guðdómleg gleði ríkti í hátíðarmessu í Glerárkirkju sunnudaginn 9. desember 2012, en annar sunnudagur í aðventu er kirkjudagur Glerárkirkju því þann dag fyrir 20 árum var kirkjan vígð. Biskup Íslands, frú Agnes M. Sigurðardóttir prédikaði, Kór Glerárkirkju ásamt einsöngvurum flutti Krýningarmessuna eftir Mozart og vígðir þjónar Glerárkirkju þjónuðu. Hér á vef kirkjunnar má nú nálgast nokkrar myndir sem Bjarni Eiríksson tók.