Fréttir

Í gær hélt hópur ungra biblíuskólanema frá YWAM Montana ásamt leiðtogum sínum aftur til Reykjavíkur eftir að hafa stutt dyggilega við safnaðarstarfið í Glerárkirkju í heila viku. Þau sáu um þemaviku fermingarbarna, heimsóttu unglingastarfið, buðu upp á lofgjörðarsamkomu og tóku þátt í guðsþjónustu sunnudagsins þar sem þau kenndu nýja sunnudagaskólasöngva, sýndu dramadans um tengsl skaparans við sköpunina og fluttu hugleiðingu. Þessi blessunarríka heimsókn var sú þriðja frá svokölluðu Outreach teymi DTS biblíuskólanema til Glerárkirkju í gegnum árin. Við í Glerárkirkju þökkum þeim af öllu hjarta. Um leið segjum við kærar þakkir við gestafjölskyldurnar sem hýstu hópinn þessa vikuna. Án þeirra hefði okkur í Glerárkirkju ekki verið mögulegt að taka á móti svona stórum hópi erlendra gesta.

Helgina 8. til 10. febrúar verður haldið æskulýðsmót á Reyðarfirði fyrir kirkjurnar á Norður- og Austurlandi. Mótið er ætlað unglingum úr 8. til 10. bekk og er reiknað með um 100 þátttakendum. Glerárkirkja stefnir á þátttöku með áhugasömum fermingarbörnum. Yfirskrift mótsins er ,,Samfélag í trú og gleði" og verður fjölbreytt hópastarf í boði. Skráningarfrestur rennur út í lok janúar og þarf að greiða 7.500 króna mótsgjald við skráningu.

Í Montana starfrækja alþjóðasamtökin Youth with a mission (YWAM) biblíuskóla eins og þau gera víða um heim. Þar er meðal annars boðið upp á fimm mánaða nám sem nefnist Discipleship Training School sem mætti útleggja á íslensku sem lærisveinaþjálfun. Síðasti hluti námsins er nokkurs konar starfsþjálfun sem kallast Outreach, eða boðunarferð. Þessa vikuna hefur Glerárkirkja notið starfskrafta 15 nemenda sem eru hér ásamt starfsfólki skólans og YWAM á Íslandi. Sunnudaginn 27. janúar mun hópurinn taka virkan þátt í guðsþjónustu safnaðarins. Tónlistarstjóri þann dag er Marína Ósk Þórólfsdóttir en það er sr. Arna Ýrr Sigurðardóttir sem heldur utan um alla þræði guðsþjónustunnar þennan dag. Dagskráin þennan dag verður að hluta til óhefðbundin. Það sama gildir um lagavalið því við hliðina á þekktum sálmum eins og "Í bljúgri bæn" má finna sálma á ensku. Í einum þeirra segir t.d.: ,,I see a generation / Rising up to take the place / With selfless faith, with selfless faith." Að vanda eru allir hjartanlega velkomnir og þess vænst að fermingarbörn fjölmenni ásamt fjölskyldum sínum. Þá minnum við á að sunnudagaskólinn er á sínum stað.

Fyrir 24 árum síðan fór Arna Ýrr Sigurðardóttir á Biblíuskóla. Um svokallaðan Discipleship Training School var að ræða og var hann á vegum Youth With a Mission, á Eyjólfsstöðum á Héraði. Nú þegar sjálfboðaliðar úr slíkum skóla sinna sjálfboðnum verkefnum í Glerárkirkju varð til pistill hennar ,,Aftur til framtíðar."

Í grein sem birtist í dag í Fréttablaðinu og á visir.is segir Jóhann H. Þorsteinsson, sviðsstjóri æskulýðsstarfs KFUM og KFUK meðal annars: ,,Ég er þakklátur fyrir að hafa fengið að taka þátt í starfi KFUM og KFUK og ég er þakklátur þeim foreldrum sem í dag hvetja börnin sín til að kynna sér starf félagsins og vonandi finna þau sig heima þar og vonandi getur það starf verið hluti af því holla og góða nesti sem er okkur öllum svo mikilvægt í ferðalagi lífsins."

Föstudagskvöldið 25. janúar verður lofgjörðarsamkoma í Glerárkirkju kl. 20:00 í umsjón biblíuskólanemenda frá YWAM Montana (Youth with a Mission) en þau eru nú stödd hér á Akureyri og er ferð þeirra hingað hluti af náminu, nokkurs konar starfsþjálfun eða "Outreach" eins og það er nefnt í dagskrá námsins sem kallast "Discipleship Training School". Lofgjörðarsamkoman er öllum opin. Tekið verður á móti samskotum sem renna til fjármögnunar á þemaviku fermingarbarna sem nú stendur yfir.

Nú er hafin þemavika fermingarbarna. Við í Glerárkirkju höfum fengið til liðs við okkur 15 ungmenni á aldrinum 19 til 29 ára frá Bandaríkjunum og Kanada og munu þau hafa veg og vanda af dagskrá þemavikunnar. Fermingarbörnin mæta samkvæmt stundarskrá í fræðslutímana og fá þar tækifæri til að kynnast gestunum. Auk þess er svo boðið upp á fjölbreytta hópavinnu undir stjórn gestanna seinnipartinn á þriðjudeginum, miðvikudeginum og föstudeginum. Þá eru krakkarnir hvattir til að mæta í unglingastarfið á fimmtudagskvöldinu í Sunnuhlíð. Einnig verða gestirnir með samkomu sem er öllum opin í Glerárkirkju á föstudagskvöldinu kl. 20:00. Dagskrá þemaviku lýkur með virkri þátttöku fermingarbarna í messu sunnudaginn 27. janúar kl. 11:00.

Hér er að finna prédikun sr. Örnu Ýrrar frá 20. janúar. Þar segir hún m.a: Við gætum kannski sagt sem svo að Guð vilji að við séum með höfuðið í skýjunum, því að hann vill umbreyta okkur en við þurfum að hafa fæturna á jörðinni, því að hann vill líka nota okkur…

Einkunnarorð kirkjunnar leggja áherslu á þá meginþætti kirkjulegs starfs að tilbiðja Guð, boða trú á hann og þjóna náunganum í kærleika. Á fræðslukvöldum í Glerárkirkju á miðvikudögum kl. 20:00 í febrúar og mars 2013 er ætlunin að skoða þessa þrjá þætti nánar. Til þess verkefnis fáum við fyrirlesara í heimsókn og vonumst til að sjá sem flesta þátttakendur. Sem fyrr verða kvöldin öllum opin, þátttaka ókeypis og kaffiveitingar í hléi gegn frjálsum framlögum í kaffisjóð. Umsjón með kvöldunum hefur Pétur Björgvin Þorsteinsson djákni í Glerárkirkju og veitir hann nánari upplýsingar í síma 864 8451.

Á sunnudaginn er messa kl. 11. Sr. Arna Ýrr Sigurðardóttir þjónar, Kór Glerárkirkju leiðir söng undir stjórn Valmars Väljaots. Barnastarfið hefst aftur og er upphaf sameiginlegt í messu. Í prédikuninni verður fjallað um það að vera með höfuðið í skýjunum og fæturna á jörðinni. Allir velkomnir.