Fréttir

Glerárkirkja í samstarfi við KFUM og KFUK á Akureyri stendur fyrir hópferð á söngleikinn Hero laugardaginn 17. mars næstkomandi.

Mánudagsmorguninn 2. mars er að vanda opið hús og upplýsingar í Glerárkirkju fyrir fólk í atvinnuleit. Húsið opnar klukkan níu og setið er og spjallað í rúma klukkustund. Þennan dag er sérstaklega leitað eftir hugmyndum um efni sem þátttakendur vildu fá upplýsingar um á næstu mánudagsmorgnum en auk þess verður verkefnið Samlist kynnt.

Sunnudaginn 1. mars næstkomandi er barnastarf og messa í Glerárkirkju kl. 11:00. Sameiginlegt upphaf er í messunni, en þegar kemur að síðasta sálmi fyrir prédikun þá fara börnin og þeir foreldra sem kjósa yfir í safnaðarsalinn þar sem barnastarfið heldur áfram. Sr. Arnaldur Bárðarson þjónar í messunni, Hjörtur Steinbergsson er organisti og félagar úr Kór Glerárkirkju leiða söng. Barnastarfið er í umsjón Valmars, Péturs, Sædísar og Kolbráar. Allir velkomnir.

Á mánudagsmorgnum hittist fólk í atvinnuleit í safnaðarsal Glerárkirkju, spjallar og spáir í spilin. Þá fær hópurinn góða gesti í heimsókn hverju sinni. Mánudaginn 23. febrúar verður það Soffía Gísladóttir frá Vinnumálastofnun sem færir hópnum upplýsingar um mikilvægustu þætti sem einstaklingar á atvinnuleysisskrá þurfa að hafa í huga. Húsið opnar kl. 09:00, erindi Soffíu er kl. 09:30. Allir velkomnir, brauð og kaffi á borðum þátttakendum að kostnaðarlausu.

Næstkomandi sunnudag, 22. febrúar verður boðið upp á fræðslu í safnaðarsal kirkjunnar á undan messu eða kl. 10:00 árdegis. Þar mun Kristján Már Magnússon sálfræðingur fjalla um efnið Samskipti foreldra og barna og unglingsárin. Minnt er á að blessuð börnin eru okkur dýrmætasti fjársjóður og foreldrar og aðrir hvattir til að gefa málefninu tíma. Nánari upplýsingar gefa prestar kirkjunnar, sr. Gunnlaugur Garðarsson og sr. Arnaldur Bárðarson.

Fimmtudagsmorgnar eru foreldramorgnar í Glerárkirkju. Þá hittast ríflega 30 foreldrar með lítil börn á samverustund í safnaðarsalnum þar sem tíminn er fljótur að líða við leik og spjall auk þess sem rómað morgunverðarhlaðborð Rósu ráðskonu svíkur engan. Allir eru velkomnir á foreldramorgna í kirkjunni.

Pétur Björgvin skrifar pistil dagsins á trú.is. Þar segir hann m.a.: ,,Sjálfur vil ég reyna að hafa Guð með í öllum aðstæðum, spyrja um hans vilja og hvað ég geti gert fyrir hann." Lesa áfram á trú.is.

Eitt af þeim verkefnum sem Evrópuráðið hefur einbeitt sér að hin síðustu ár snýr að trúarlegu víddinni í fjölmenningarsamfélaginu. Það er vilji Evrópuráðsins að auka umræðu um og rannsóknir á hinu fjöltrúarlega umhverfi sem fær sífellt meira vægi í stjórnmálum, menntamálum og samfélagi fólks um allan heim. Verkefni sem þetta felur ýmsar áskoranir í sér enda snýr það að heimsmynd fólks, trúarlegum og siðferðislegum gildum þeirra. Afrakstur þessarar vinnu er meðal annars bók sem kom út undir ritstjórn John Keast á síðasta ári og nefnist ,,Religious diversity and intercultural education: a reference book for schools." Lesendur glerarkirkja.is eru hvattir til að lesa kynningu á bókinni sem nálgast má á netinu (pdf-skjal, 498 kb). Smellið hér til að lesa kynninguna. (Pétur Björgvin skráði 22. júní 2008)