Fréttir

,,Að smætta kristni í bókstafstrú og tefla henni gegn manneskjunni, vinnur gegn eðli hennar og er til skaða í samfélaginu. Auglýsingin um helgina minnir okkur á það." segja prestarnir Árni Svanur Daníelsson og Kristín Þórunn Tómasdóttir m.a. í pistli í dag í Fréttablaðinu og á trú.is. Þar benda þau á að: ,,Kristin manneskja byggir ekki trú sína á bókstöfum og lögmáli, heldur fyrirheitinu um frelsi og ást Guðs, eins og það birtist í Jesú frá Nasaret."

Nýung í starfi Glerárkirkju þetta haustið er að verðandi fermingarbörnum er boðið í gistiferð á Hólavatn. Þar dvelur hver hópur frá síðdegi fyrra daginn til hádegis næsta dag við leik og hópefli. Með ferðinni vill Glerárkirkja kynna það æskulýðsstarf sem fram fer á vegum kirkjunnar og samstarfsaðila hennar KFUM og KFUK. Nú þegar formlegri skráningu er lokið hafa tæplega 50% árgangsins skráð sig í ferðirnar, en þær eru valkostur til viðbótar við fermingarfræðsluna. Fyrsti hópurinn fer af stað í dag kl. 16:30 frá Glerárkirkju. Ef einhver hefur óvart gleymt að skrá sig er sá hinn sami / sú hin sama beðin að hringja í 864 8451.

Agnes Sigurðardóttir, biskup Íslands, vígði sr. Solveigu Láru Guðmundsdóttur til embættis vígslubiskups á Hólum við hátíðlega athöfn í Hóladómkirkju í dag. Í prédikun sinni minnti Solveig Lára áheyrendur á að Jesús grætur yfir ranglætinu í heiminum og sagði meðal annars: ,,Jesús grætur líka yfir okkur hér á Íslandi. Hann grætur yfir hælisleitendum sem ekki fá hæli hér á landi, þó við höfum hér nóg pláss og fullt af hjartarými, hælisleitendum sem eru bara fólk eins og við og börnin okkar. Jesús grætur yfir fórnarlömbum heimilisofbeldis á Íslandi og öllum þeim sem líður illa vegna óuppgerðra til finninga, sorgar, reiði og gremju."

Hólahátíð hefst formlega í kvöld kl. 20:00 í Auðunarstofu. Þar flytur Ragnheiður Þórsdóttir erindi um vefnað til forna við kljásteinsvefstól sem þar hefur verið settur upp. Hápunktur hátíðarinnar er svo á sunnudag en þá vígir biskup Íslands, frú Agnes M. Sigurðardóttir, Solveigu Láru Guðmundsdóttur til vígslubiskups á Hólum. Meðal gesta verða sex erlendir biskupar.

Í landi Háls í Svarfaðardal stendur minnismerki um sr. Friðrik Friðriksson. Á dögunum var skilti með upplýsingum um ævi og störf sr. Friðriks, endurnýjað.

„Friður, öryggi og sáttargjörð í Myanmar“ var yfirskrift ráðstefnu sem haldin var dagana 2. til 5. ágúst sl. í Myanmar. Að baki ráðstefnunnar stóðu samtök kristinna kirkna í Asíu og samkirkjuráðið í Myanmar. Nóbelsverðlaunahafinn og mannréttindabaráttukonan Aung San Suu Kyi ávarpaði ráðstefnuna og benti á að leita þyrfti einfaldra, en djúpstæðra leiða til að tryggja frið.

Þýski fréttavefurinn welt.de birti fyrir tveimur dögum áhugaverða grein sem ber heitið „Die Kirche räumt sich selbst aus dem Weg.“ Þar fjallar blaðamaðurinn Dankwart Guratzsch um þá breytingu sem hefur orðið í samfélaginu eða öllu heldur í viðhorfi kirkjunnar í gegnum tíðina. Hann byrjar á því að minna á að sú hafi verið tíðin að einræðisherrar eins og Stalín hafi þvingað trúfélög til þess að láta heilagar byggingar af hendi. Í dag taki trú og kirkjubyggingar sífellt minna pláss í þjóðfélaginu.

Á morgun, þriðjudaginn 14. ágúst hefjast gistiferðir verðandi fermingarbarna á Hólavatn í Eyjafirði. Minnt er á að nauðsynlegt er að skrá sig. Því fyrr sem fólk skráir sig, þeim mun betur getum við skipulagt ferðirnar. Þessar ferðir eru ekki hluti af formlegri fermingarfræðslu kirkjunnar heldur er um kynningu á æskulýðsstarfi Glerárkirkju að ræða. Skráning stendur yfir á netfangið glerarkirkja@glerarkirkja.is

Á sunnudegi um Verslunarmannahelgi er helgistund í Lögmannshlíðarkirkju kl. 11:00 í umsjón Péturs Björgvins djákna. Lesnir verða Davíðssálmar og farið með bænir. Áætlað er að helgistundin taki 15 mínútur. Fólk er hvatt til að taka með sér nesti því að helgistund lokinni setjumst við undir kirkjuvegginn og borðum nestið okkar ef veður leyfir.

Sunnudaginn 12. ágúst næstkomandi gerumst við árrisul í Glerárkirkju og bjóðum alla velkomna í guðsþjónustu klukkan níu um morguninn. Guðsþjónustan verður í umsjón sr. Alfred Essig frá Brackenheim í Þýskalandi og verður guðsþjónustan alfarið á þýsku. Að henni lokinni mun Pétur Björgvin segja frá safnaðarstarfinu og stöðu íslensku kirkjunnar í stuttu erindi í safnaðarsalnum. Það erindi verður sömuleiðis aðeins á þýsku. Dagskráin er opin öllum sem áhuga hafa.