Fréttir

KFUM og KFUK reka sumarbúðir við Hólavatn í Eyjafirði. Síðustu ár hefur farið fram mikil uppbygging þar og nú í vor var tekinn í notkun nýr svefnskáli og hefur aðstaða þar stórbatnað. Skráning er mjög góð í sumarbúðirnar og eru nú þegar 200 börn skráð í flokka sumarsins og er það 25% aukning frá fyrra ári. Enn eru nokkur pláss laus.

Kór Glerárkirkju er væntanlegur til landsins á morgun, þriðjudag, eftir að hafa tekið þátt í Sing'n Joy 2012 í Vínarborg þar sem fjöldi kóra frá öllum heimshornum kom saman, annars vegar til þess að standa fyrir margskonar sameiginlegum tónleikum og hins vegar til að taka þátt í kórakeppni. Kór Glerárkirkju kemur heim með bronsverðlaun í farteskinu.

Hér er birt hugvekja sem flutt var í Lystigarðinum í dag, 17. júní.

Að vanda er það skátafélagið Klakkur sem sér um hátíðarhöldin á Akureyri í samstarfi við Akureyrarstofu. Dagskráin er fjölbreytt og ættu allir að finna eitthvað við sitt hæfi. Við í Glerárkirkju óskum Akureyringum öllum til hamingju með daginn og flotta dagskrá og hvetjum fólk til að taka virkan þátt í dagskránni án þess að gleyma að mæta í kaffisöluna í Glerárkirkju!

Kvenfélagið Baldursbrá verður með sína árlegu kaffisölu í safnaðarsal Glerárkirkju sunnudaginn 17. júní frá kl. 14:30. Í andyri kirkjunnar verða klukkustrengir sem félagskonur hafa unnið til sýnis.

Þeim sem fæddir eru 1999 og búa í sókninni ætti að berast boðsbréf í vikunni frá æskulýðsstarfi Glerárkirkju þar sem sagt er frá ferð á Hólavatn um miðjan ágústmánuð fyrir verðandi fermingarbörn og aðra áhugasama einstaklinga úr 1999-árganginum. Tilgangur ferðarinnar er að kynna æskulýðsstarf Glerárkirkju.

Spennan vex: Nú eru aðeins nokkrir dagar í brottför hjá Kór Glerárkirkju, en kórinn heldur af landi brott á næsta þriðjudag. Ferðinni er heitið til Austurríkis þar sem kórinn mun taka þátt í alþjóðlegri kórakeppni.

Um fimmtíu manns tóku þátt í ráðstefnu Alkirkjuráðsins í Colombo í Sri Lanka sem lauk í gær. Þar var guðfræði díakoníunnar (kærleiksþjónustunnar) rædd út frá aðstæðum fólks sem er jaðarsett sem og út frá þörfum fátækari landa á suðurhveli jarðar.

Frá og með næstkomandi sunnudegi og fram á haust verða allar messur kl. 20:00 í Lögmannshlíðarsókn. Undantekningar verða auglýstar sérstaklega. Fyrsta kvöldmessan verður í Glerárkirkju, sunnudagskvöldið 10. júní. Prestur er sr. Gunnlaugur Garðarsson. Kór Glerárkirkju syngur undir stjórn Valmars Väljaots.

Kvennakórinn EMBLA heldur tónleika í Glerárkirkju sunnudaginn 10. júní kl. 16:00. Flutt verða verk fyrir kvennaraddir frá árunum 1120 til 2000. Stjórnandi er Roar Kvam. Aðgangseyrir er 2.500 kr.