Fréttir

Glerárkirkja stendur fyrir skyndihjálparnámskeiði fyrir starfsfólk og sjálfboðaliða kirkjunnar og KFUM og KFUK. Um fjögurra kennslustunda námskeið er að ræða. Námskeiðið fer fram í safnaðarsal Glerárkirkju þriðjudaginn 9. október og hefst kl. 17:30. Þátttaka er ókeypis, skráning á netfangið glerarkirkja@glerarkirkja.is.

Fimmtudagskvöldið 4. október kl. 20:00 er foreldrafundur í UD-Glerá, sameiginlegu unglingastarfi KFUM og KFUK og Glerárkirkju. Til fundarins er boðað til að ræða markmið og ramma unglingastarfsins og sérstaklega fyrirhugaða ferð á Evrópuhátíð KFUM og KFUK í ágúst 2013. Fundurinn verður haldinn í félagsheimili KFUM og KFUK í Sunnuhlíð en þar fer unglingastarfið fram. Þeir 50 krakkar sem mættu í gærkvöldi (27. september) fengu foreldrabréf með sér heim, en það er einnig birt hér á vef Glerárkirkju:

Þriðja fimmtudagskvöldið í röð mættu um 50 krakkar í sameiginlegt unglingastarf KFUM og KFUK og Glerárkirkju sem nú hefur hlotið nafnið UD-Glerá. Dagskrá kvöldsins hófst með helgistund þar sem að sagt var frá því þegar Jesú hitti lærisveinana við Tíberíasvatn og borðaði með þeim grillaðan fisk og brauð (Jóh. 21). En það var í þriðja sinn sem Jesús birtist lærisveinum sínum upp risinn frá dauðum. Að helgistund lokinni tók við skapandi verkefni þar sem hver hópur bjó til myndastyttu. Kvöldinu lauk svo með pizzuveislu en krakkarnir slógu saman í 15 pizzur. Það var kátur og fjörugur hópur sem hélt heim á leið að samveru lokinni, öll með foreldrabréf í vasanum því næst (4. október) er foreldrafundur.

Messað verður í Glerárkirkju sunnudaginn 30. september kl. 11:00. Sr. Gunnlaugur Garðarsson þjónar. Kór Glerárkirkju leiðir almennan safnaðarsöng undir stjórn Valmars Väljaots. Barnastarf á sama tíma í safnaðarsal. Sameiginlegt upphaf í messu. Allir hjartanlega velkomnir.

Í dag er samvera eldri borgara í Glerárkirkju. Þar ræðir Ágúst Þór Árnason um stjórnarskrá, gildismat og trú. Samveran hefst með söng og helgistund. Boðið er upp á kaffihlaðborð á vægu verði að hætti Rósu. Að venju eru rútuferðir frá Lindasíðu kl. 14:45. Reiknað er með að samverunni ljúki um hálf fimmleytið. Allir hjartanlega velkomnir.

Starfsfólk Glerárkirkju og fulltrúar frá Kór Glerárkirkju sóttu í gær eldvarnarnámskeið hjá Birni H. Sigurbjarnarsyni, aðstoðarslökkviliðsstjóra á Akureyri. Námskeiðið er liður í símenntun og þjálfun þeirra sem koma að starfinu í Glerárkirkju. Farið var yfir helstu lög og reglur varðandi eldvarnir og benti Björn á ýmsa mikilvæga þætti varðandi rýmingu húsnæðis, útgönguleiðir, staðsetningu slökkvitækja, neyðarlýsingu og útlýsingu. Þá fengu þátttakendur kynningu á helstu gerðum slökkvitækja og tækifæri til að prufa þær allar. Síðasta mál á dagskrá var svo æfing í notkun á eldvarnarteppi.

Þegar sólin skín og við njótum sumartímans þá fara sumar fréttir fram hjá okkur. Ein gleðifrétt sumarsins snéri að því að Sjúkratryggingar Íslands hækkuðu endurgreiðslugjaldskrá sína fyrir tannlækningar barna um 50%. Hækkunin tók gildi 1. júlí 2012 en hún gildir TÍMABUNDIÐ til næstu áramóta. Áætlað er að með þessu hækki hlutfall endurgreiðslu raunkostnaðar úr tæpum 42% að meðaltali í 62,5%. Þess vegna segjum við í Glerárkirkju við foreldra barna (17 ára og yngri): Drífið ykkur með börnin til tannlæknis fyrir áramót!

Á mánudögum er boðið upp á gönguhóp í Glerárkirkju. Lagt er af stað frá Glerárkirkju kl. 16:30 og gengið upp í Lögmannshlíðarkirkju. Þar gefst tækifæri til að fá sér heitan drykk en einnig er sest niður í kirkjunni og höfð stutt helgistund. Öll þau sem áhuga hafa eru velkomin í gönguhópinn. Áætlað er að hópurinn sé kominn til baka að Glerárkirkju kl. 18:30. Umsjón með gönguhópnum hafa hjónin Regína B. og Pétur Björgvin Þorsteinsson. Nánari upplýsingar gefur Pétur í síma 864 8451.

Marína Ósk Þórólfsdóttir sem stjórnar yngri kórum Glerárkirkju er fjölhæf tónlistarkona. Þetta árið kemur hún meðal annars að plötunni "Latínudeildin" þar sem hún syngur lagið "Á fyrsta reit" Okkur hér í Glerárkirkju þykir vænt um að geta bent á þessa plötu um leið og við bendum á Youtube upptöku af laginu sem er vel til þess fallið fyrir foreldra barnanna í kórunum sem og aðra til að kynnast söngkonunni Marínu Ósk aðeins betur.

Unga fólkið sem er í framvarðarsveitinni í sunnudagaskólastarfinu í Glerárkirkju sótti í dag, sunnudaginn 23. september, námskeið þar sem Magnea Sverrisdóttir djákni leiðbeindi þeim um ýmsa þætti er snúa að sunnudagaskólastarfinu. Og þar er í mörg horn að líta: Hvernig tökum við á móti krökkunum, hvernig tölum við, hvaða framkomu veljum við, hvað látum við brúðurnar gera og þá hvernig, og svona mætti lengi telja. Námskeiðið er hluti af stærri námskeiðaröð sem Glerárkirkja stendur fyrir að vanda á haustin. Dæmi um önnur námskeið má nefna eldvarnarnámskeið og skyndihjálparnámskeið.